ដោយ៖ ពេជ្រ សុធារី | ថ្ងៃចន្ទ ទី21 ខែមេសា ឆ្នាំ2014, ម៉ោង 03:36 PM
លោកស្រី មូរ សុខហួរ បេក្ខជនជាប់ឆ្នោតតំណាងរាស្ត្រគណបក្សសង្គ្រោះជាតិ (រូបថត៖ សុទ្ធ គឹមសឿន)
គណបក្សសង្គ្រោះជាតិ នឹងរៀបចំសន្និសីទសារព័ត៌មានមួយ ទាក់ទងនឹងករណីប្រើហិង្សាជាប្រព័ន្ធពីសំណាក់កងកម្លាំងអាជ្ញាធរ នៅថ្ងៃទី២២ ខែមេសា ស្អែកនេះ បន្ទាប់ពីមានការបំបែកដោយហិង្សាមួយបានកើតឡើងនៅទីលានប្រជាធិបតេយ្យកាលពីព្រឹកមិញនេះ។
សេចក្តីប្រកាសព័ត៌មានរបស់គណបក្សសង្គ្រោះជាតិ ចេញផ្សាយនៅថ្ងៃទី២១ ខែមេសានេះ ឲ្យដឹងថា នៅវេលាម៉ោង ៩ព្រឹកថ្ងៃអង្គារស្អែកនេះ លោកស្រី មូរ សុខហួរ បេក្ខជនជាប់ឆ្នោតតំណាងរាស្ត្រគណបក្សសង្គ្រោះជាតិ នឹងធ្វើសន្និសីទសារព័ត៌មានមួយ ស្តីពី ករណីប្រើប្រើហិង្សាជាប្រព័ន្ធពីសំណាក់កងកម្លាំងអាជ្ញាធរ នៅទីស្នាក់ការកណ្តាលគណបក្ស ក្នុងសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។
ការធ្វើសន្និសីទរបស់បេក្ខជនជាប់ឆ្នោតតំណាងរាស្ត្រគណបក្សសង្គ្រោះជាតិរូបនេះ ធ្វើឡើងបន្ទាប់ពីមានការបំបែកដោយហិង្សាមួយ បានកើតឡើងនៅព្រឹកថ្ងៃទី២១ខែមេសានេះ ពីសំណាក់កម្លាំងសមត្ថកិច្ចចម្រុះ ទៅលើក្រុមអ្នកអមដំណើរលោកស្រី មូរ សុខហួរ ដែលព្យាយាមចូលទៅកាន់ទីលានប្រជាធិបតេយ្យ ដើម្បីសម្តែងមតិ។ ការបំបែកដោយហិង្សានោះ បានបណ្តាលឲ្យមនុស្ស៣នាក់ រងរបួសក្បាល និងមនុស្ស៤នាក់ទៀត រងរបួសស្រាល៕